Претседателот на босанскиот ентитет Репулика Српска, Милорад Додик, потврди дека минатата недела отпатувал за Хвар за да се сретне со хрватскиот претседател Зоран Милановиќ со хеликоптер кој го користи српскиот претседател Александар Вучиќ, но во тоа не гледа ништо спорно бидејќи, како што вели, се работи за цивилно, а не воено летало.
„Тоа е хеликоптерот што го користи Вучиќ, нашиот е на редовен сервис. Го замолив (Вучиќ) да ми го отстапи, немаше никакви проблеми“, изјави Додик во интервјуто објавено од бањалучкиот весник „Глас Српске“, пренесе „Хина“.
Средбата на Додик со Милановиќ на Хвар на 25 јули предизвика бројни реакции, особено поради начинот на кој претседателот Додик пристигна во Хрватска и леталото со кое го направи тоа.
Од кабинетот на претседателот на Хрватска, откако хрватскиот премиер Андреј Пленковиќ побара од Милановиќ да ја објасни ненајавената средба со Додик на Хвар, соопштија дека тоа е „нормален работен состанок“ за кој било информирано министерството за внатрешни работи.
Додик сега вели дека оние кои го доведуваат во прашање фактот дека тој патувал со хеликоптерот на Вучиќ „немаат поим за животот“. Доколку не е воен хеликоптер, како што посочува, може слободно да се лета насекаде, а важно е само навремено да се пријави.
Што се однесува до причините поради кои заминал на Хвар, тој рече дека Милановиќ е пред се интересен соговорник.
„Мислам дека се разбравме“
„За мене беше важно да го задржам вниманието на хрватската држава во однос на позицијата во Босна и Херцеговина. Ни се допаѓа тој пристап во кој се посветува внимание на уставот на народот и организацијата на Босна и Херцеговина во согласност со Уставот“, рече Додик.
Тој тврди дека со Милановиќ разговарал и за престојот во Босна и Херцеговина, односно во Дервента, каде хрватскиот претседател во март им додели одликувања на 103-та бригада на ХВО и на некои нејзини членови. Ова предизвика бура од осуди од политичарите на босанските Срби, кои побараа хрватската претседателка да биде прогласена за непожелна личност во Босна и Херцеговина, ентитет Репулика Српска.
Додик сега се обиде за се да ја обвини Католичката црква „во чии ходници“, како што тврди, е договорено доделувањето одликувања, а изјавил дека тоа не е прифатливо за РС.
„Разговарав за тоа со Милановиќ и мислам дека се разбравме“, изјави Додик.
На прашањето дали Милановиќ се противи на најавеното одбележување на 4 август во Приједор како „ден на прогонот на Србите од Хрватска“, тој нејасно одговори.
„Не е лесно кога тие (Хрватска) слават победа, а ние положуваме венци. Но, тие, како и ние, имаат право на сопствен пристап. Ние не можеме да им забраниме, како што тие не можат да ни забранат“, рече Додик, кој во петокот го покани и Вучиќ во Приједор.