Спортскиот директор Себастијан Кел ја отфрли можноста Борусија (Дортмунд) да се раздели со англискиот репрезентативец Џaд Белингем во овој преоден рок кој се затвора во четврток. Некои медиуми во Германија и Англија тврдат дека најсериозен интерес за играчот доаѓа од Ливерпул.
„Тој ќе остане со нас и јас лично го гарантирам тоа“, изјави Кел во интервју за „Скај“.
„Нема никакви барања, нема преговори, иако интересот за него е сериозен. Во моментов нема што да се одлучи толку многу и да бидам искрен, ситуацијата е ваква цело лето. Тој исто така нема намера сега да се пресели во друг клуб и тоа го знам лично од него“, додаде директорот.
Белингем пристигна во Дортмунд во 2020 година и има договор со тимот до 2025. „Жолто-црните“ се надеваат дека ќе го задржат во клубот и по 2023 година.