Министерката за енергетика Сања Божиновска најави дека наскоро ќе биде познато кој модел ќе се избере за изградба на хидроцентралата Чебрен – дали целосно државно или со партнер. „Најубаво би било како држава сами да го реализираме проектот, но станува збор за инвестиција од најмалку една милијарда евра, а буџетот не дозволува лесна одлука“, изјави министерката на Националниот самит за дигитална енергетска и безбедносна инфраструктура.
Работна група веќе работи на проектот под координација на Министерството, а се прават и завршни пресметки околу висината на браната и дали Чебрен ќе се гради заедно со Галиште. „Има 14 неуспешни обиди во минатото, сега сакаме сè да направиме како што треба“, додаде таа.
Божиновска го истакна и значењето на новиот Закон за енергетика, кој наскоро треба да стапи во сила. Според неа, некои од мерките, како борбата со енергетската сиромаштија и проектите за батерии за складирање струја од обновливи извори, веќе се започнати.
„Процесот е започнат. Нешто ќе оди побрзо, нешто побавно – но се движиме напред“, порача министерката.