Републиканецот Глен Јангкин рече дека граѓаните на Вирџинија (САД) заслужуваат сами да изберат кои возила одговараат на нивните потреби, а идејата владата да им кажува на луѓето каков автомобил можат да купат ја нарече „фундаментално погрешна“, пишува АП.
„Уште еднаш, Вирџинија прогласува независност. Ова законодавство за ЕВ е погрешно и наметнато од неизбрани лидери на речиси 5.000 километри од Комонвелтот“, рече тој.
Овој потег беше брзо осуден од демократите и еколошките здруженија. „Се чини дека мисли дека има поголема моќ од Владимир Путин“, рече лидерот на мнозинството во Сенатот, Скот Суровел.
Southern Environmental Law Center ја нарече одлуката „незаконска, кусогледа и лоша јавна политика“. „Стандардите во овој предлог-закон ќе помогнат да се поттикне транзицијата кон почисти возила и да донесат значителни здравствени и еколошки придобивки за сите жители на Вирџинија. Затоа Генералното собрание ги усвои“, рече адвокатот Трип Полард.
Но, канцеларијата на Јангкин не се согласува. „Законите за електрични возила како оние во Калифорнија се неспроведливи и не се во допир со реалноста, и за среќа законот не не обврзува со нивните регулативи. Секоја помисла дека производителите на автомобили треба да се соочат со милионски казни наместо да им дозволат на нашите граѓани сами да ги изберат своите возила е целосно апсурдна“, велат тие.
Законот за „чист автомобил“ на Вирџинија првично беше донесен во 2021 година, кога државната влада беше целосно контролирана од демократите.
Тој бараше, почнувајќи од 2024 година, одреден процент од новите патнички возила што ги продаваат производителите да бидат електрични или хибридни електрични. Механизмот вклучуваше усвојување на калифорниските стандарди за штетните емисии од возилата.
Програмата се однесува на производителите, а не на дилерите на автомобили. Производителите кои не ги исполнуваат условите можат да купат кредити од други кои ја надминале целта за да избегнат казни.