Израел би можел да испумпува илјадници литри морска вода во мрежата од тунели под Газа во обид да ги истера борците на Хамас на површината, според неодамнешниот напис во Wall Street Journal (WSJ), но таквиот потег може да предизвика секакви неочекувани и многу опасни ризици.
Говорејќи за Sky News, воениот аналитичар професор Мајкл Кларк рече дека „тоа може да се направи и ќе биде ефективно“.
Веднаш потоа, тој предупреди на ризиците:
„Тие (израелската армија) не знаат дали заложниците се држат таму или не“, рече професорот, сугерирајќи дека тие би можеле да ги загрозат животите на преостанатите заложници кои ги држи Хамас.
Друг ризик, рече професорот Кларк, ќе биде контаминација на подземните водоносни слоеви кои служат како снабдување со вода за пиење во Газа.
„Тоа би било вандализам кон животната средина, поради што светот нема да гледа позитивно на Израел“, додаде тој.
Меѓутоа, друга можност е Израел воопшто да нема намера да ги поплави тунелите, туку само „ја пушти приказната во јавноста“ што според зборовите на професорот „би го избркало Хамас од тунелите со зборови, а не со вода“.