Две групи во Европскиот парламент – „Патриоти за Европа“ и „Левицата“ побараа оставка од Европската комисија и нејзината претседателка Урсула фон дер Лајен во дебата во Европскиот парламент во Стразбур.
„Под ваше водство, ЕУ се движи кон бездната“, рече претседателот на „Патриоти за Европа“ Јордан Бардела. „Ја претворивте ЕУ во шампион на бирократијата. Сакате да ја елиминирате едногласноста за да го одземете гласот на земјите-членки“, истакна тој:
„Да речеме – Европа не е административна машина, туку цивилизација. Цивилизацијата не се води од норми, туку од консензус на слободните народи и нациите што ја сочинуваат. Гласањето за недоверба на оваа Комисија не значи уништување на Европа, туку нејзино спасување.“
„Вие го поддржавте геноцидот во Газа, одбивате да ги прекинете трговските односи со Израел и да му наметнете ембарго за оружје, додека веќе го подготвувате 19-тиот пакет против Русија“, рече Манон Обри од Левицата, презентирајќи ги причините на нејзината група:
„Госпоѓо фон дер Лајен, мора да си одите. Капитулиравте пред Доналд Трамп не само со поддршка на неговиот неоколонијален план за Газа, туку и со отстапување место во сите правци на економските интереси на Соединетите Американски Држави на штета на Европејците. Со потпишување на еднонасочен договор без никаков демократски мандат, се согласивте да ја претворите ЕУ во вазал на режим кој станува фашистички.“
„Вистината е дека нашите противници не само што се подготвени да ја искористат поделбата меѓу нас, туку активно ја провоцираат“, нагласи фон дер Лајен во својот одговор, цитирајќи го говорот на Владимир Путин во клубот Валдај, во кој тој зборуваше за „пукнатини во европската структура“ и „нестабилно единство на ЕУ“.
„Ова е најстариот трик во учебникот. Сеење поделба, ширење дезинформации, создавање жртвено јагне. И сето ова за да ги сврти Европејците едни против други. Да се обиде да ја намали нашата будност додека се бориме меѓу себе. Да ја ослабне нашата решителност и отпор. Ова е стапица. И едноставно не можеме да си дозволиме да паднеме во неа.“
„Ве обединува вашата желба да уништувате“, им рече претседателот на ЕНП, Манфред Вебер, на претставниците на двете групи. Социјалистите, либералите и зелените, исто така, рекоа дека нема да го поддржат гласањето, но нагласија дека имаат загриженост за работата на Комисијата. Гласањето за двата предлози е во четврток.