Актерот од многу популарната американска тинејџерска серија „Еуфорија“, Ангус Клауд, почина во понеделникот, соопшти неговото семејство.
Не е наведена причината за смртта на актерот, кој го играше наркодилерот Фез О’Нил во наградуваната серија.
Во соопштението се вели дека Клауд се мачел да се справи со неодамнешната смрт на неговиот татко и имал постојани ментални проблеми.
„Единствената утеха што ја имаме е да знаеме дека Ангус сега повторно е со својот татко, кој му беше најдобар пријател“, наведе неговото семејство и додаде:
„Ангус отворено зборуваше за неговата борба со менталното здравје и се надеваме дека неговата смрт може да биде потсетник за другите дека тие не се сами и не треба да се борат сами во тишина“.
„Еуфорија“ предводена од Зендаја е една од најгледаните серии на HBO на сите времиња и има освоено Еми награди.
Серијата предизвика контроверзии, но и пофалби за мрачното прикажување на проблемите со кои се соочуваат современите американски тинејџери, вклучително и зависноста од дрога и сексуалното насилство.