Конзорциумот предводен од сопствениците на Chicago Cubes, семејството Рикетс, се повлече од борбата за купување на англискиот фудбалски клуб Челси, соопшти американското семејство. „Станува сè појасно дека некои прашања не можат да се решат со оглед на необичната динамика на процесот на продажба. Му се восхитуваме на Челси и неговите навивачи и им посакуваме успех на новите сопственици“, се вели во соопштението.
Одлуката беше објавена по истекот на рокот за поднесување понуди за премиерлигашот, кој го продава санкционираниот руски сопственик Роман Абрамович. Понудата беше предводена од претседателот на Cubes, Том Рикетс.
Изненадното повлекување на семејството Рикетс остави три понуди: сопственикот на ЛА Доџерс, Тод Боули, поранешниот претседател на Ливерпул, Мартин Бротон и косопственикот на Бостон Селтикс, Стив Палука како кандидати за „сините“.
Во меѓувреме, британската влада вчера објави дека воведува санкции за извршниот директор на лондонскиот фудбалски клуб – Јуџин Таненбаум во врска со руската инвазија на Украина. Ќе биде предмет на замрзнување на имотот и транспортни санкции, што значи дека секој брод или авион што го поседува, изнајмува, контролира или оперира може да биде задржан доколку влезе во Обединетото Кралство.
Санкции се изречени и за Давид Давидович, близок до сопственикот на Челси, Роман Абрамович.
Британската влада како причина за санкционирањето на Таненбаум и Давидович ги наведува нивните блиски врски со Абрамович, на кого Лондон веќе му воведе санкции.