Министерот за надворешни работи, Бујар Османи попладнево на брифинг со новинарите потврди дека тв презентерката Бесмира Ејупи е вработена во Министерството за надворешни работи (МНР).
-Во текот на годината од Министерството за политички систем се преземени вкупно 13 соработници, вклучувајќи и личноста која што ја спомнувате. Дел од нив во рамки на систематизацијата преку К5 програмата, дел преку директна спогодба. Делумно е точна информацијата, но на позиција соработник во протокол, што е почетна позиција во МНР. Во моментов имаме огласи за 16 нови соработници, кој што е во тек и сите кои што сакаат да работат во дипломатијата, можат тоа да го направат, рече Османи на прес-конференција.
Министерот демантираше дека Ејупи е советник во МНР, бидејќи треба 10 до 15 години во Министерството со многу положени испити и искуство, за да се премине од помлад соработник во советник.
-Не гледам спорно во процесот. Во МНР работат над 450 луѓе. Секој може да се вработи доколку ги исполнува условите за тоа, додаде Османи и уште еднаш повтори:
-Како што се преземени сите, така е направено и во овој случај. Прашање е дали се исполнети условите за позицијата и дали е направено во законска процедура, заклучи шефот на дипломатијата.