Следната фаза од процесот на уставни измени во Република Северна Македонија е формирање експертска работна група, координирана од Министерството за правда, за подготовка на амандманите, по што ќе има широка јавна дискусија, а потоа за измените ќе се расправа во Парламентот. Ова го најави премиерот Димитар Ковачевски.
„Зборуваме за уставни измени, но никој од граѓаните не видел како изгледаат овие уставни измени. Значи првата фаза е да ги напишат експерти. Не зборуваме само за вклучување на Бугарите во уставот, туку и за другите заедници кои изразиле желба да бидат дел од нашиот Устав, во кој веќе се опфатени други“, рече Ковачевски.
Според него, во работната група ќе има експерти по уставно право и правници, а ќе бидат поканети и експерти од политичките партии, вклучително и од опозицијата. Ковачевски изрази очекување дека опозицијата ќе учествува во работата за уставните измени, иако „покажаа дека не сакаат да учествуваат во ништо освен да го блокираат Парламентот“.
За да се усвојат уставните измени во Собранието, потребни се 80 пратеници да гласаат за нив. Без пратениците од опозициската ВМРО-ДПМНЕ тоа речиси и да не е можно.
Преговорачката рамка на државата бара влезот на Бугарите во Уставот да се случи за да може земјата да започне со отворање на преговарачките поглавја во преговорите за членство во ЕУ. Пристапните преговори со ЕУ, земјава ги почна на 19 јули, минатата година, а во моментов во тек е билатералниот скрининг кој треба да заврши на крајот од годинава.