Турскиот претседател Реџеп Таип Ердоган денеска предупреди дека „санкциите и заканите“ нема да ја одвратат Турција од потрагата по енергија во источниот Медитеран, јави АФП.
„Во однос на ова прашање, нашата земја има право и ние ќе ги браниме своите права со сите средства што ни стојат на располагање. Ние нема да подлегнеме пред санкции и закани“, рече Ердоган.
Тензиите растат во источниот Медитеран, каде што се откриени големи резерви на гас во претходните години, што ги разгорува апетитите на приморските држави.
Анкара испрати истражувачки брод придружуван од воени бродови во област што Грција ја смета за нејзината територија во понеделникот.
Министрите за надворешни работи на ЕУ се состанаа во петокот за да изразат солидарност со Грција и да повикаат на деескалација.
Грчката влада повика на конкретни чекори против Турција, а европските земји ќе разговараат за ситуацијата во источниот Медитеран на состанокот кон крајот на август.
Франција го зголеми своето воено присуство во регионот во четвртокот за поддршка на Грција. Односите меѓу Париз и Анкара се затегнати во последните месеци.
Ердоган рече дека неговата земја е подготвена за дијалог, но повторно ја нападна Грција во саботата, обвинувајќи ја Атина за малтретирање на муслиманите и луѓето што зборуваат турски јазик на нејзината територија.
„Грчките власти треба да ги прекинат мерките што наликуваат на државен тероризам без одлагање. Нашите џамии и нашите училишта се напаѓани“, рече турскиот лидер.