Претседателот на Република Турција, Реџеп Таип Ердоган, утре, 6 септември, ќе пристигне во официјална посета на Босна и Херцеговина.
Се очекуваат серија средби со високи претставници на раководството на Федерацијата. Последен пат Ердоган ја посети Босна и Херцеговина во август минатата година.
Бошњачкото раководство, исто така, отпатува во Турција на средби со него и со други високи турски претставници. Покрај Босна и Херцеговина, Ердоган ќе ги посети и Србија и Хрватска.
Турција и Босна и Херцеговина имаат силни и навистина пријателски врски. Двете земји воспоставија официјални дипломатски односи на 29 август 1992 година.
„Мирот и стабилноста на регионот и Европа се директно поврзани со мирот и стабилноста на Босна и Херцеговина. Важно е да се фокусираме на зачувување на мултиетничкото, мултикултурното и мултирелигиското општествено ткиво на Босна и Херцеговина и зголемување на развојот и благосостојбата на БиХ“, беше наведено пред неколку дена во соопштението на Министерството за надворешни работи на Турција по повод одбележувањето на 30-годишнината од воспоставувањето дипломатски односи со Босна и Херцеговина.
Република Турција е еден од најважните партнери на земјите од Западен Балкан, а од претстојната посета на претседателот Ердоган на Босна Херцеговина, Србија и Хрватска се очекува дополнителен развој на веќе добрата соработка на овие земји во политичка и економска смисла.