Турскиот претседател Реџеп Тајип Ердоган денеска ја повика Организацијата за економска соработка силно да го крене својот глас против израелските напади врз Појасот Газа.
„Ако ние како Организација за економска соработка денес не го кренеме гласот заедно како муслимани, кога ќе го кренеме гласот? Конфликтите во окупираните палестински територии ни ги скршија срцата“, рече тој во обраќањето на 16-от самит на оваа економска организација во Ташкент, главниот град на Узбекистан.
Организацијата за економска соработка е политичка и економска меѓувладина организација основана во Техеран во 1985 година од лидерите на Иран, Пакистан и Турција, јавува „Анадолија“.
„Израел продолжува да бомбардира училишта, џамии, цркви, болници и универзитети, кршејќи ги сите можни вредности на човечноста“, рече Ердоган.