Турскиот претседател Реџеп Таип Ердоган ја укина старосната граница за пензионирање во средата, на помалку од шест месеци пред изборите, дозволувајќи им на повеќе од 2 милиони работници веднаш да се пензионираат.
Претседателот ова го соопшти на прес-конференција.
Владејачката партија на Ердоган, АКП, значително ја зголеми минималната плата минатата недела како дел од обидот да ја врати поддршката изгубена поради инфлацијата, падот на лирата и остриот пад на животниот стандард.
Возраста за пензионирање претходно беше 58 години за жени и 60 години за мажи. Засега не се знае колку ќе чини новиот систем, а Ердоган најави дека 2,25 милиони луѓе имаат право на непосредна пензија. Во Турција моментално има 13,9 милиони пензионери.
Работничките групи веќе неколку години протестираат против условот за минимална возраст, барајќи наместо тоа, работниците да треба да работат задолжителен број денови.
Се смета дека овој потег ќе му помогне на Ердоган пред клучните избори во јуни.