Кристијан Ериксен, засилувањето на Манчестер Јунајтед, за првпат се огласи по пристигнувањето на „Олд Трафорд“.
Данецот неодамна пристигна како слободен играч од Брентфорд и потпиша тригодишен договор со Јунајтед.
Наскоро ќе има можност да дебитира во црвениот дрес и признава дека тоа ќе му биде малку невообичаено, бидејќи е навикнат да игра за противничките екипи во Театарот на соништата.
„За мене е чудно што сум во Јунајтед, мислев дека тоа нема да се случи. Да се биде играч на Манчестер Јунајтед е нешто навистина посебно. Мојата кариера, пред тој инцидент на Евро 2020, воопшто не беше поврзана со враќањето во Велика Британија, така што тоа што сум овде сега ме прави среќен. Чувството е навистина добро“, призна Ериксен.
На прашањето што го привлече да ја избере онаа понуда, што дојде од Манчестер Јунајтед, од многубројните, беше јасен.
„Фудбалот, јас сум некој кој секогаш сака да игра фудбал. Идеите што ги има менаџерот и што ги слушнав од разговорите што ги имав со него, едноставно, се видов себеси како играм фудбал во Манчестер. Во исто време ова е голем клуб, ако не и најголем. Кога ќе го кажеш тоа име каде било, тие знаат од каде си. Клубот има одлична историја и убаво е чувството да се биде дел од нешто што е толку големо во фудбалската историја“, додаде Данецот.
Доаѓањето на Ерик тен Хаг на кормилото на Јунајтед се чини имаше пресудно влијание тој да се најде во редовите на Манчестер Јунајтед.
„Неговото влијание е големо. Дојдов затоа што сакам да играм фудбал, не дојдов овде само заради амблемот, туку да играм. Разговорите со него за фудбалот и идеите што ги има, влијаеа на мојата одлука да дојдам во Манчестер Јунајтед“.
Тен Хаг имаше шанса да го види Ериксен на дело не многу одамна, кога Данецот тренираше со Холанѓаните додека беше во процес на барање клуб, пред да замине во Брентфорд.
„Се надевам дека мојот стил на игра одговара на неговите идеи, се надевам дека ќе се манифестира на добар, позитивен начин. Се разбира, неговиот стил на фудбал е нешто што мислам дека ми одговара“, додаде Кристијан.
Тој потпиша договор на три години и со оглед на ситуацијата дека има вграден дефибрилатор, не може да каже уште колку ќе игра.
„Навистина не знам. Некаде прочитав дека треба да имаш најмалку 35 години за да се пензионираш, а јас ќе имам 33 години кога ќе заврши овој договор, така што има уште неколку години! Никогаш не се знае во фудбалот, го поувствував тоа и на моја кожа. Нешто секогаш може да се случи, па мораш да се пензионираш некогаш. Ќе видиме кога ќе дојде тој ден, сега за сега сум среќен што сум тука, ќе видиме што носи иднината“, додаде тој.
Тој призна дека целта му е да игра на Светското првенство во Катар.
„Дури и кога бев во процес на рехабилитација минатата година, имав сон да можам да играм на Светското првенство. Сега дефинитивно тоа е мојата цел, тоа е добра работа. Тоа е нешто за што сите сонуваме. Бев таму претходно, тоа е нешто што секогаш го паметите. Сепак, да се оди на Светско првенство со Данска повторно, тоа е нешто посебно“.
Вели дека е скромен, семеен човек, а кои му биле идоли откри кога растел.
„Имав неколку од нив. Франческо Тоти, во тоа време многу играв Фудбал Менаџер, тогаш играв со тимот на Рома! А тука беше и Михаел Лаудруп. Како Данец го бирам Лаудруп, но немав многу идоли. Посакав да бидам на теренот и да ја играм мојата игра“, заклучи Кристијан Ериксен.