Специјалниот пратеник на САД за Западен Балкан Габриел Ескобар денеска изјави дека косовскиот премиер Албин Курти има два дена да одговори на барањата кои му беа упатени на средбата и најави дека до петок заедно со претставникот на ЕУ за дијалог меѓу Белград и Приштина, тој ќе извести дали има напредок или не, пренесува „Репортери“.
Ескобар пред новинарите зборуваше и за членот 7 од Охридскиот договор, формирањето на Заедницата на општини со српско мнозинство, наведувајќи дека Курти има план за Заедницата, но го крие.
Тој не откри дали нацрт-статутот на Заедницата го подготвил Косово или Европската унија, но нагласи дека нацртот постои и дека се крие.
Ескобар, кој од вчера е во Приштина и кој заедно со Лајчак синоќа се сретнаа со Албин Курти, нагласи дека косовскиот премиер има два дена да одговори на барањата што му биле изнесени на средбата.