132
Специјалниот пратеник на САД за Западен Балкан, Габриел Ескобар, предупреди на „многу можни последици“ доколку Црна Гора не ја реши повеќемесечната длабока политичка и институционална криза.
„Црна Гора е во многу длабока криза. Блиску е до институционален колапс каков што едвај сум видел во ниту една земја. Нема влада. Две влади паднаа и нема напредок во формирањето на друга. Тие немаат кворум во Уставниот суд кој би можел да потврди нови избори“, изјави Ескобар во интервју за Гласот на Америка.
Заменик-помошникот државен секретар на САД потсети дека мандатот на претседателот Мило Ѓукановиќ истекува напролет. Претседателката на Парламентот на Црна Гора, Данијела Ѓуровиќ, неодамна распиша претседателски избори за 19 март.