Нуно Еспирито Санто, новиот менаџер на Тотенхем, изјави дека не се сомнева дека најдобриот напаѓач на клубот, Хари Кејн, ќе остане верен на „Спарси“.
Вистина, Кејн уште порано истакна дека е желен да смени средина и да се пресели во клуб со кој може да освојува трофеи, а интерес за него покажаа Манчестер Сити, Челси и Манчестер Јунајтед.
Не е тајна дека Сити веќе испрати понуда, дури 100 милиони фунти, што беше одбиено во Лондон.
И покрај јасната желба да го напушти клубот, Санто е оптимист во однос на Кејн.
– Не се сомневам. Сакам Хари да се опорави и да се одмори добро. Амбициозни сме и сметаме на него. Хари е наш играч. Точка. Нема потреба да зборуваме за ништо друго. Сега е време тој да се одмори. Кога ќе се врати, ќе имаме добар разговор, рече Нуно.