Членките на Европската унија (ЕУ) формално постигнаа договор за воведување на ковид-пасош за патувања, што претставува уште еден чекор кон повторно отворање на туристичкиот сектор ова лето, соопштија два неименувани дипломатски извори.
Сертификатите ќе им овозможат на вакцинираните лица, оние кои се опоравиле од Ковид-19 или лица со негативни резултати од тест, полесно да патуваат во рамките на ЕУ, каде ограничувањата на движењето во голема мера влијае на туристичката индустрија, пренесе Ројтерс.
Сите земји-членки на ЕУ „ја подвлекоа својата заложба да ја подготват рамката до летото 2021 година“, според документот поддржан од национални претставници, до кој Ројтерс имал пристап.
Европскиот парламент, кој исто така мора да се согласи на предлогот за да стапи во сила, треба да се согласи за својата позиција подоцна овој месец, а конечните разговори меѓу пратениците, националните пратеници и извршната власт на европскиот блок треба да започнат во мај.
Земјите на ЕУ работат паралелно за да ги обезбедат „неопходните технолошки решенија“, се вели во документот на ЕУ, така што новите дигитални или хартиени сертификати ќе можат да се стават во употреба по одобрувањето.
Договорот меѓу членките на ЕУ, исто така, вклучува одредби против дискриминација на оние кои не можат или не сакаат да се вакцинираат.
Додека од европските членки ќе се бара да ги признаваат вакцините одобрени од ЕУ, специфични земји може да издадат сертификати за прифаќање на руската вакцина Спутник или кинеската вакцина Синовак.