Европската Унија изрази загриженост поради ненадејното затворање на канцелариите на Косово со кои управува Србија, предупредувајќи дека овој потег може да го отежне животот на тамошното малцинство.
„Ненадејното затворање на овие канцеларии ќе има негативни ефекти врз секојдневниот живот и условите за живеење на заедниците на косовските Срби, бидејќи ќе го ограничи нивниот пристап до основните социјални услуги со оглед на очигледното отсуство на алтернативи во моментот“, навел портпаролот на ЕУ, Петер Стано.
Kosovo: 🇪🇺 notes with great concern Special Police operations at the offices of Serbia-run institutions. EU urges Kosovo once again to avoid unilateral actions that could raise tensions, and to address these issues through the EU-facilitated Dialogue. https://t.co/FvArYH9Xx2 pic.twitter.com/rWYua85zcn
— Peter Stano (@ExtSpoxEU) February 4, 2024
Припадници на косовската полиција извршиле претреси во просториите на општините Пеќ, Исток и Клина, кои работеле по српски систем и им забраниле да извршуваат активности.
Административното седиште на овие општини било во градовите Гораждевац, Осојане и Видање во западниот дел на Косово, кои се претежно населени со Срби.
Косовската полиција минатата недела затвори уште четири општински администрации кои работеле по српски систем, а беа лоцирани во Драгаш.
Министерот за внатрешни работи на Косово претходно најави затворање на овие општински администрации со порака „дека наскоро единствена институција на Србија во Република Косово ќе биде нејзината амбасада во Приштина“.
Повикувајќи на намалување на тензиите меѓу Косово и Србија, Стано рече дека „се планира статусот на овие структури да се реши во рамките на дијалогот со посредство на ЕУ“, и дека е неопходно да се избегнат еднострани потези.
„ЕУ го повикува Косово да избегне еднострани дејствија кои би можеле да ги подигнат тензиите и да се справи со овие прашања преку дијалог со посредство на ЕУ“, истакнал Стано.
Загриженост за последните акции на Косово изрази и американскиот амбасадор во Приштина, Џефри Ховениер. Тој посочил дека „неодамнешните активности на Владата на Косово имаат директен и негативен ефект врз припадниците на етничките Срби и другите малцински заедници во Косово“.
„Овие акции непотребно ги зголемуваат етничките тензии и како последица на тоа ја ограничуваат способноста на Соединетите Американски Држави да служат како ефикасен застапник за Косово на меѓународната сцена“, рекол амбасадорот на САД.