ЕУ мора да се реформира пред да се прошири, стои во заклучоците усвоени вечерва на последниот состанок на Европскиот совет за оваа година.
Европскиот совет ја нагласува континуираната важност на проширувањето на ЕУ како геостратешка инвестиција во мирот, безбедноста, стабилноста и просперитетот. Проширувањето е двигател за подобрување на економските и социјалните услови на европските граѓани, за намалување на нееднаквостите меѓу земјите и треба да ги промовира вредностите врз кои е заснована ЕУ. Со цел понатамошно проширување, и идните земји-членки и ЕУ мора да бидат подготвени до моментот на пристапување. Земјите-кандидатки мора да продолжат со своите реформски напори, особено во областа на владеењето на правото. ЕУ треба да ги преземе потребните подготовки и реформи во меѓувреме, што ќе ја направи посилна и ќе го зајакне европскиот суверенитет, се наведува во текстот.
Европскиот совет ја забележува потребата од борба против дезинформациите и надворешното мешање, како и од заштита на слободните и плуралистички медиуми, нагласувајќи ја законската одговорност на онлајн платформите во борбата против ширењето на дезинформации и нелегална содржина.
Европските лидери ги осудуваат неодамнешните хибридни напади врз ЕУ и поединечни европски земји. Во позадина на засилената хибридна кампања од страна на Русија и Белорусија, тие повикуваат на засилување на напорите за заштита на критичната инфраструктура и за спречување и одвраќање на хибридните напади, вклучително и преку воведување санкции.
Војната во Украина и нејзините последици се идентификувани во заклучоците како егзистенцијален предизвик за ЕУ. Се наведува дека лидерите разговарале за напредокот во напорите за подобрување на европската одбрана во наредните години.