Европската Унија официјално се придружи на повикот на САД, Украина и другите меѓународни партнери за целосен и безусловен прекин на огнот во Украина во траење од најмалку 30 дена, се вели во соопштението на високата претставничка на ЕУ за надворешни работи и безбедносна политика, Каја Калас.
„Европската Унија останува непоколеблива во својата посветеност кон сеопфатен, праведен и траен мир во Украина, врз основа на принципите на Повелбата на ОН и меѓународното право, и ги поздравува сите напори за постигнување таков мир“, се вели во соопштението.
Калас нагласи дека паузата во непријателствата би можела да биде клучен чекор кон намалување на „страдањето на цивилите и овозможување простор за значајни преговори за завршување на агресивната војна“.