Европската Унија штотуку даде зелено светло за 17-тиот пакет санкции против Русија, објави агенцијата Некста на X.
„Фајненшл тајмс“ објави дека новите ограничувања ќе важат за 149 танкери од руската „флота во сенка“ и 60 компании.
Санкциите ќе влијаат и на компании од трети земји, вклучувајќи ги ОАЕ, Турција, Србија, Виетнам и Узбекистан, за кои постои сомневање дека ѝ помагаат на Русија да ги избегне санкциите.
АФП објави нови детали за пакетот санкции. Мерките биле во подготовка дури и пред европските лидери да издадат ултиматум до Москва во обид да постигнат резултати во мировните преговори.
Пакетот ќе биде официјално усвоен следниот вторник, а вклучува и ставање на црната листа на 200 танкери што моментално се користат за заобиколување на ограничувањата за извоз на руска нафта. АФП објави дека компаниите во земји како Виетнам, Србија и Турција, кои се обвинети за помагање во снабдувањето со стока на руската војска, исто така ќе се соочат со ограничувања.
Исто така, на списокот ќе бидат додадени уште неколку десетици руски функционери, на кој веќе се наоѓаат речиси 2.400 поединци и субјекти, чии средства се замрзнати, а визите се забранети. Пакетот, исто така, воведува санкции за руските граѓани за кибер напади, кршење на човековите права и саботажи во Европа.
Официјалните лица признаа дека најновата рунда санкции против Москва е „релативно ограничена“ во споредба со претходните пакети, бидејќи ЕУ се бори да постигне договор за целите.
Заедно со овие мерки, лидерите на ЕУ ѝ се заканија на Русија со „масовни санкции“ доколку не се согласи со предлогот за прекин на огнот од 30 дена, поддржан од САД.