Западен Балкан стана фокус на европската агенда за време на бугарското претседателство, а улогата на Бугарија овде беше голема, изјави европратеникот од ЕПП Емил Радев на почетокот на француското претседателство со ЕУ и во контекст на темата за пристапување на Западен Балкан во заедницата. „Токму за време на бугарското претседателство многу се зборуваше за нивно пристапување. Бугарија отсекогаш била „за“ пристапување на Западен Балкан“, нагласува Радев за бугарските медиуми, додавајќи дека договорите постигнати во текот на преговорите за членство во ЕУ мора да се спроведат.
Европратеникот потсети дека Грција се расправала со Северна Македонија за името повеќе од 20 години. Радев појасни дека Бугарија не го попречува приемот на Западен Балкан во ЕУ. „За нас е многу добро земјите од Западен Балкан да се приклучат на големото европско семејство, за нас е многу подобро и нашите соседи да бидат земји членки“, додаде тој. Така, додава, економските и културните врски меѓу земјите ќе бидат подлабоки.
„Не можеме да правиме компромиси со веќе постигнатите договори“, изјави бугарскиот претставник во ЕП. Она што се бара од Република Северна Македонија е да ги почитува, нагласи Радев и изрази жалење за „провокациите кон Бугарија“.
„Обидите да се зборува за македонското малцинство во Бугарија е опасно“, рече тој. „Следниот попис во земјава ќе покаже дека кај нас нема македонско малцинство“, тврди Радев.
Европратеникот ја критикуваше средбата на претседателот на Северна Македонија со ОМО Илинден – организација која не е регистрирана во Бугарија. За него, ова е провокација.
Според европратеникот, односите меѓу двете земји остануваат нејасни за нашите западни партнери, но тие години наназад не го разбирале и прашањето за името меѓу Грција и Македонија.
„За Западот безбедноста во регионот е поважна, како и економските врски. Во ЕП, Зелените и социјалистите инсистираат на брз пристап на Северна Македонија. Не можеме да правиме компромиси со нашата историја и идентитет“, категоричен е Емил Радев.