Европскиот парламент ја отвори својата прва пленарна седница во Стразбур денес од почетокот на пандемијата на ковид-19, по повеќе од 15 месеци, иако со помал број пратеници, но овој потег се смета за успех за Франција, која се избори тој град да остане место на заседавање на ЕП заедно со Брисел.
„Ова е многу важен ден за Европскиот парламент. По повеќе од 15 месеци, се вративме во седиштето во Стразбур“, рече на француски претседателот на ЕП, Италијанецот Давид Сасоли.
„Ова враќање е знак на доверба и надеж за сите“, додаде тој на аплаузите на десетината европратеници, претежно Французи.
Ниту една седница на Европскиот парламент не се одржа во Стразбур од февруари 2020 година, кога Алзас беше на првиот удар на пандемијата.
Враќањето е во форма на хибридна сесија, бидејќи 705 европратеници би можеле да изберат да дојдат во Стразбур или да гласаат далечински од нивната земја, што беше избрано од голем дел од нив.
Иако хибридните сесии се одржуваат веќе неколку месеци од Брисел, француските власти инсистираат на тоа седниците да се вратат во Стразбур.