ФА му дозволи на Тухел да живее во Германија, ќе работи од дома

Раководството на Фудбалскиот сојуз на Англија ќе му дозволи на новиот тренер на „трите лава“ Томас Тухел да продолжи да живее во Германија.

Договорот на стручњакот со ФА официјално ќе стапи на сила на 1 јануари 2025 година, но фудбалската централа нема да инсистира Тухел да се пресели во Лондон.

За споредба, поранешниот селектор на Англија, Герет Саутгејт, требаше да минува најмалку три дена неделно во базата на „трите лава“, каде што одржуваше состаноци со тренерите на другите репрезентации на Англија.

Се чини дека тоа нема да биде предуслов за Тухел. Наместо тоа, тој ќе продолжи да живее првенствено во Минхен, каде што ќе биде поблиску до семејството.