Убијците на Феликс во судница се осмелија да го наречат неговото радосно мавтање со опашката – НАПАД! Снимка на која куче радосно им приоѓа ја користат како алиби за злосторството и доказ дека било агресивно. Крвникот Љубе Крстевски се појавува на само едно од шесте презентирани видеа и Феликс не се ни доближува до него, велат од граѓанската иницијатива „Зелен хуман град“.
Како што додаваат од ЗХГ, „убијците тврдат дека љубопитност и приврзаност се причина за ѕверска ликвидација“.
„Каква болна логика! Ако едно животно секојдневно ти приоѓа со доверба, тоа значи дека заслужува да биде убиено. Толку се бедни, што ова „доказно видео“ не им го доставиле на обвинителството и на адвокатката. Но не зашто е доказ за „агресијата“ на Феликс, напротив, зашто е неосновано и зашто сакаат да го манипулираат процесот зад затворени врати“, велат активистите.
Додаваат дека убивањето на невино животно што им верува на луѓето е злосторство што не може да се сокрие зад евтини извитоперени конструкции.
„Ја повикуваме судијката Лидија Петровска да изрече максимална затворска казна за убиецот Љубе Крстевски и неговиот соучесник Бранко Билбиловски. Тие не само што не се каат, туку тврдат дека Феликс „сам си го барал“ да го убијат“, велат од Зелен хуман град.
Ова е прво судење за кое јавноста пројави интерес, а по објавените снимки на кое се гледа како обвинетиот со стап го тепа едногодишното бездомно куче, на плац во Момин Поток.
Казната која е предвидена за малтретирање на животно е, од парична, до затвор од една година.