Играчот од средниот ред на Манчестер Јунајтед, Бруно Фернандеш смета дека во текот на минатата кампања дисциплината во тимот не била на потребното ниво и веројатно тоа е причината за неубедливите игри и резултати на „црвените ѓаволи“. Тимот остана шести во Премиер лигата и нема да учествува во Лигата на шампионите. Летото беше направена тренерска смена со доаѓањето на Ерик тен Хаг, под кого тимот веќе забележа три победи од три натпревари во контроли.
„Дисциплината е важна и мислам дека тоа ни недостигаше одреден период“, изјави Португалецот, цитиран од „Атлетик“.
„И дисциплината не треба да значи само како се однесувате на теренот, туку и како се снаоѓате надвор од него – да не доцните на тренинг, да не доцните во ресторанот за храна. Ако некој доцни, треба да биде казнет“, продолжи Фернандеш.
Тој објасни дека Тен Хаг одржува многу ред и тоа дава резултати: „Мислам дека тоа што го прави е одлично, бидејќи и јас сакам секогаш да бидам точен и затоа не можам да имам никакви проблеми“.