Вицепремиерот и еден од лидерите на ВЛЕН, Арбен Фетаи остро реагираше по веста дека кај судијата Ѓоко Ристов се пронајдени 350 илјади евра, за кои се сомнева дека се поврзани со корупција, оценувајќи дека овој развој на настаните ја уништува и последната трага од доверба што граѓаните ја имаа во правосудниот систем.
Во објава на Фејсбук, Фетаи нагласи дека ова не треба да се гледа како изолиран случај, туку како „врв на ледениот брег на систем кој со години ги штити силните, а ги угнетува обичните граѓани“.
Според него, ситуацијата станува уште поалармантна бидејќи името на Ѓоко Ристов не е непознато за јавноста и за правосудните институции. Фетаи потсетува дека Ристов, заедно со судијата Енвер Беџети, биле дел од одлуките што го отворија патот за слобода за поранешниот директор на тајната полиција, Сашо Мијалков, кој денес слободно се движи во странство.
„И овие одлуки треба да се истражат до крај, за да се разјасни што се случило и кој бил вклучен“, напиша Фетаи.
Тој, исто така, изрази загриженост дека случајот Ристов може да биде само еден од многуте скриени случаи, прашувајќи колку други судии и обвинители може да се кријат зад водот на правдата, користејќи го законот како покритие за корупција.
Вицепремиерот повика на итна институционална акција, целосни истраги и конкретна одговорност, нагласувајќи дека чистењето на правосудниот систем е непроменливо и неопходно за враќање на довербата на граѓаните.
Судијата Ѓоко Ристов, во чија семејна куќа во Неготино беа пронајдени околу 350.000 евра соѕидани во ѕид, минатата недела во Апелациониот суд – Скопје пријавил дека е болен и заминал на боледување, по што неговите колеги повеќе не го виделе. Оттогаш не е познато дали Ристов се наоѓа во државата.