Првиот вицепремиер и министер за животна средина, Изет Меџити синоќа пред почетокот на состанокот на претседателството на ВЛЕН изјави дека Арбен Фетаи ќе продолжи да ја извршува функцијата вицепремиер за добро владеење. Тој ќе биде вклучен и во партиското раководство на ВЛЕН.
Во меѓувреме, коалицијата ќе го номинира Азир Алиу за позицијата министер за здравство.
„Арбен Фетаи останува вицепремиер за добро управување, додека Азир Алиу ќе биде предложен за министер за здравство“, рече Меџити.
Меџити, исто така, најави дека очекува во иднина дел од пратениците од Алијансата за Албанците и Европскиот фронт ќе се приклучат на коалицијата ВЛЕН.
Оваа недела се очекува да се достави предлогот до собранието за нов министер за здравство откако Арбен Таравари реши да ја напушти функцијата и да излезе од Владата. Алиу е поранешен министер за информатичко општество и администрација.