Словачкиот премиер Роберт Фицо синоќа во Брисел изјави дека Европската Унија е неправедна кон Србија и дека го спречува нејзиното пристапување затоа што е „премногу горда, самоуверена и независна“ земја, објави белградската новинска агенција Бета.
По самитот меѓу Европската Унија и Западен Балкан, на кој Србија не учествуваше за прв пат по 14 години, Фицо напиша на Инстаграм дека српскиот претседател Александар Вучиќ е „независен политичар, што не е добро прифатено во ЕУ“.
„Србија постојано се условува со сè повеќе услови за влез во ЕУ со цел да се одложи што е можно подолго, иако е една од најдобро подготвените земји. Двојните стандарди се типична карактеристика на европската политика. Од една страна, големите земји ја туркаат Украина кон ЕУ, иако воопшто не е подготвена, а од друга страна, ја спречуваат Србија да се приклучи кон Унијата затоа што е премногу горда, самоуверена и независна“, рече Фицо.
Тој додаде дека на самитот „посебно го поддржал“ Вучиќ, „кој намерно отсуствувал за да протестира против неправедниот третман на Србија од страна на институциите на ЕУ“. Според него, српскиот лидер и српскиот народ „секогаш ќе ја имаат неговата поддршка“.
Фицо, исто така, напиша дека состанокот во Брисел не започнал добро бидејќи автомобил со скала го удрил неговиот авион, кој потоа бил неупотреблив.
„Денешната средба со земјите од Западен Балкан кои сакаат да станат членки на ЕУ беше подеднакво скептична“, рече Фицо.
Порано истата вечер, унгарскиот премиер Виктор Орбан рече дека однесувањето на Брисел кон Србија е „срамно и неправедно“.
„Србија е клучна земја, но целиот процес на проширување беше целосен неуспех во последните четири години. Србија не се повлече, а во исто време, Западен Балкан е златна резерва, гледано економски, за ЕУ“, им рече Орбан на новинарите, коментирајќи го фактот дека Србија не била присутна на состанокот. „Се однесуваме на неприфатлив начин. Прво треба да се справиме со Србија, да најдеме решенија за проблемите, а потоа да продолжиме со другите. Сега правиме спротивното.“
На крајот од самитот, лидерите на земјите од ЕУ и Западен Балкан издадоа заедничка изјава, потврдувајќи ја целосната и јасна посветеност на европската перспектива за земјите од регионот на Западен Балкан. Покрај заклучоците за политиката на проширување на ЕУ, во декларацијата се забележува дека Србија доживува забавување на реформите, влошување на слободата на говорот, недостаток на напредок во судството, зголемување на тензиите и поделбите во општеството и ја повикува земјата да постигне значителен напредок во областа на владеењето на правото и нормализацијата на односите со Косово.
„Советот ќе се врати на прашањето за отворањето на Групата 3 во согласност со преговарачката рамка, нагласувајќи ја особено потребата од значителен понатамошен напредок од страна на Србија во областа на владеењето на правото и нормализацијата на односите со Косово, што ќе продолжи да го одредува целокупното темпо на преговорите за пристапување“, се вели во заклучоците.