Словачкиот премиер Роберт Фицо изјави во парламентот дека нема никакви сознанија за евентуални контакти на лица од неговото опкружување со американските јавни личности Стивен Банон и Џефри Епстин, нагласувајќи дека лично не користи вообичаени дигитални средства за комуникација.
Одговарајќи на пратенички прашања, Фицо истакна дека не поседува мобилен телефон, не испраќа текстуални пораки и, како што рече, дури и ја избегнува електронската пошта. Поради тоа, според него, не може да има увид во преписката или контактите на други лица и не сноси одговорност за нивните комуникации.
Премиерот додаде дека нема информации за лицата кои биле спомнати во дискусијата, ниту за евентуални контакти што биле предмет на интерес на пратениците.
Во истото обраќање, Фицо најави дека Братислава ќе ја оспори одлуката на Европската Унија за забрана на испораката на руски гас од 2027 година. Според него, ваквата мерка би предизвикала сериозна економска штета, не само за Словачка, туку и за поширокиот регион.
Тој ја критикуваше постапката на носење на одлуката, посочувајќи дека таа била усвоена со квалификувано мнозинство во рамките на Европската комисија, иако, како што оцени, станува збор за прашање од стратешко значење за кое е неопходен консензус на сите земји членки.
Фицо истакна дека Словачка ќе продолжи да води независна надворешна политика и дека очекува таквиот пристап да донесе конкретни економски и дипломатски придобивки за државата.