Повеќето европски земји се опседнати со омраза кон Русија, а за да ја ослабат западните земји се подготвени да се борат до последниот украински војник, изјави словачкиот премиер Роберт Фицо.
– Поголемиот дел од земјите членки (на Европската унија) се опседнати со Украина и омраза кон Русија, а од тоа има одредени ставови, кои без никаква критика се шират во европските медиуми, дека е неопходно да се продолжи со поддршка на војната во Украина – рече Фицо во својата видео порака објавена на социјалните мрежи.
Според него, заплашувањето со неосновани тврдења дека Русија наводно може да нападне една од земјите на НАТО е поврзано со ова.
– Всушност, Украина се користи само за геополитички цели за да се ослаби Русија економски и меѓународно – истакна Фицо.
Како што наведе, Украина служи и како „златно теле“ за компаниите кои се занимаваат со трговија со оружје.
– Се плашам дека во име на овие геополитички цели Западот ќе војува со Русија до последниот украински војник, а ние не сме далеку од таа цел – заклучи Фицо.
Претходно, рускиот претседател Владимир Путин неодамнешните изјави на американскиот претседател Џозеф Бајден дека Русија наводно може да го нападне НАТО ги нарече „целосна глупост“. Рускиот лидер нагласи дека Москва не е заинтересирана за војна со земјите од НАТО – нема причини за тоа: ниту политички, ниту економски, ниту воени.