Калин Георгеску, екстремно десничарски проруски романски политичар, ја нарече Украина „фиктивна држава“ и изјави дека нејзината поделба меѓу соседните земји е неизбежна. Георгеску ја даде изјавата во интервју со новинарот Јон Кристоју, како што пренесува украинска Правда.
„Светот се менува. Границите ќе се сменат. Згора на тоа, ако се сменат границите, каде ќе бидеме ние? Ја имаме Северна Буковина, која е од интерес. Го имаме Бугеак, го имаме Северен Марамуреш, нели? Од поранешната … како се викаше .. Закарпатски региони има и Унгарци… Лвов, кој ќе остане со Полјаците, и Мала Русија“, рече Георгеску.
Тој изјави дека „поделбата на Украина е неизбежна“.
„Сто проценти, тоа ќе се случи. Па, тие немаат друг начин! Патот до такво нешто е неизбежен. Украина е фиктивна држава. Тоа е Украинската Советска Социјалистичка Република“, рече Георгеску.
Северна Буковина е дел од регионот Буковина и денес се наоѓа во украинската област Черновци во западниот дел на земјата. Буџак (Бугеак на романски) е историски регион во јужна Украина помеѓу сливот на Дунав, Днестар и Црното Море, а денес е дел од Одесската област. Северен Марамуреш е географско-историски регион кој ја опфаќа приближно источната половина на Закарпатската област во западна Украина, во близина на границата со Романија.