Лидерот на СДСМ, Венко Филипче информираше дека со премиерот Христијан Мицкоски разговарал за правосудството, енергетиката и некои работи во делот на стратешките движења и проекти во здравството. Вели дека ова е првична средба и треба да се разработи методологијата, но, според него, како што истакна, има волја од двете страни.
Не е договорена втора лидерска средба, но ќе се определат неколку експерти од областа на правосудството и енергетиката за да се вклучат во изработката на законите кои се дел од реформската агенда.
Филипче очекува сите лидери на политички партии во наредниот период да седнат на иста маса.
-Разговаравме и за уставните измени и евроинтеграциите и тука морам да кажам дека имаме различни позиции. Ги разбирам позициите на премиерот, но останува за ова да зборуваме дополнително, кажа претседателот на СДСМ по лидерската средба, додавајќи дека заедно со Мицкоски не разговарале за предвремени парламентарни избори.