„Заборавил ли Филипче дека беше дел од Владата на СДС која на пензионерите им даваше некоја ситна сума од околу стотина денари, а во одреден период достигнуваше 1000 денари или илјада и нешто“, велат од ВМРО-ДПМНЕ како реакција на прес-конференцијата на претседателот на СДСМ во однос на исплатата на пензиите.
Партијата вели дека поранешната Владата предводена од тогашниот премиер Зоран Заев, „не само што не се грижеше за пензионерите, туку со сумата која им ја даваше ги понижуваше, навредуваше или што уште не“.
„Вака ли се грижеа тие за пензионерите. СДС е само олицетворение за понижување, партија која никому не даваше повисоки примања, партија која шири лаги и дезинформации, партија на која апсолутно не и грижа за никому и за ништо во државата. СДС е партија во која поединци се грижат за личниот џеб. Нешто што Филипче може да направи за доброто на сите е да собере сила и да замине од СДС.
ВМРО-ДПМНЕ не ги познава овие поими. ВМРО-ДПМНЕ е партија која се грижи за секој еден граѓанин подеднакво“, велат од партијата на Христијан Мицкоски.
Претходно, претседателот на СДСМ упати остри критики и сериозни предупредувања дека пензискиот систем се наоѓа во состојба на длабока финансиска нестабилност, која, според него, е директно предизвикана од „лошите, непромислени и манипулативни политики“ на Владата предводена од ВМРО-ДПМНЕ и коалицијата ВЛЕН.
Филипче ја започна прес-конференцијата со силна осуда на, како што рече, „невидената хајка од лаги и манипулации“ што доаѓаат од власта:
„Сведоци сме на една хајка, на бесрамни лаги и манипулации, голем дел дури и од премиерот. Такво политичко лицемерие досега не сме виделе. Обидот премиерот да ја препише кризата што самиот ја создаде и измамата кон пензионерите на СДСМ е нечист потег без преседан“, порача тој.
Фондот на пензиското и инвалидското осигурување ја известува јавноста дека исплатата на пензиите се одвива нормално и веќе на први декември 2025 пензионерите ќе ја добијат ноемвриската пензија, за што вкупно ќе се исплатат средства во висина од 9.297.493.427 денари (девет милијарди 297 милиони 493 илјади и 427 денари).
-Пензионерите треба да бидат спокојни, бидејќи Владата ја гарантира исплатата на пензиите и тука не треба да има никаков сомнеж или страв дека пензии нема да има. Фондот на ПИОМ во координација со Владата исплатата ја врши секој први во месецот и истото ќе продолжи да го прави и во 2026 година, порачаа, меѓу другото, од Фондот.