Фирмата „Тор индустрис“ во сопственост на внукот на Али Ахмети, Дрин денеска побара извинување од пратеникот на ВМРО-ДПМНЕ, Драган Ковачки. Во спротивно, велат од таму, ќе бидат приморани да го тужат пратеникот за изнесените лаги.
-Во врска со видео-изјавата на членот на Извршниот Комитет на ВМРО-ДПМНЕ и пратеник Драган Ковачки, објавена на Јутуб каналот на ВМРО-ДПМНЕ, како и на интернет страницата на Сител Телевизија, со наслов „Ковачки: Внукот на Али Ахмети со фирмата која ја купи Соравија работи на Коридор 8“, сакаме да ве информираме дека се работи за комплетна невистина и погрешна пласирана информација во јавноста. „Тхор Индустриес“ ги демантира сите невистини искажани од господинот Ковачки, а кои беа подоцна пренесени на веб страната на Сител Телевизија, стои во соопштението на компанијата.
„Тор индустриас“ бара јавно извинување од страна на ВМРО-ДПМНЕ и Ковачки, а доколку не дојде до такво нешто, ќе ги превземе сите правни дејствија за претрпената штета од, како што велат, изнесените невистини.
Ковачки денеска на прес-конференција порача дека внукот на Али Ахмети со неговата фирма работи на изградбата на Коридорот 8 и други патишта и се крие како подизведувач.
-Дрин Ахмети со Тор Индустриес, заедно со уште една фирма од кланот Зајас за која ќе зборуваме деновиве е вклучен во изградба на Коридор 8, договорот кој го имаат двете фирми е 1.3 милиони евра за ископ и други градежни работи. Кога голем број фирми едвај наоѓаат работа, фирмата на Дрин е најпосакуван партнер и дежурен подизведувач, на многу поголеми фирми. Дали зад тоа се крие Ахмети и дали има трговија со влијание?, рече меѓу другото Ковачки.