Пофалбите за Барселона и тренерот Ханси Флик не престануваат. Да се победи Баерн со 4:1 и да се уништи Реал Мадрид со 4:0 на „Сантијаго Бернабеу“ се само потврда за неверојатната форма на каталонскиот гигант.
Барселона постигна 37 гола на 11 натпревари во Ла Лига, плус 11на три натпревари од Лигата на шампионите! Од 48 гола, Роберт Левандовски постигна дури 17 (2 асистенции), Рафиња 10 (9 асистенции), а Ламине Јамал 6 (7 асистенции). Ударното трио постигна 33 гола и 17 асистенции.
Флик ја создаде „машината“, но посебна приказна е Бразилецот Рафиња. Со капитенската лента на раката, 27-годишниот крилен напаѓач на 14 меча сезонава има ефект како на претходните два! Со Чави, поранешниот играч на Лидс кој беше платен 58 милиони евра, минатата сезона имаше 10 гола и 13 асистенции на 37 натпревари, додека во воведната сезона имаше 10 гола и 12 асистенции на 50 одиграни натпревари.
„Рафиња е јасен пример за тоа како функционира тимот. Неговата врска со Левандовски и Јамал креира „трозабец“ со најдобар скор во Европа. Но, тој и асистира, а да не зборуваме за големиот притисок врз противничките дефанзивци”, објасни Флик.
Рафиња со „хет-трик“ против Баерн го одбележа својот 100-ти натпревар во дресот на Барселона, а само четири месеци пред доаѓањето на Ханси Флик беше меѓу првите кандидати за заминување од „Камп Ноу“. За среќа на Барселона, никој не посегна длабоко во џебот и не плати 60 милиони евра.
Денеска Рафиња е првото име во Барселона. Флик му ја врати магијата, бидејќи правилно ги процени неговите можности, ја промени неговата позиција и го откри „ѕверот“.