На добар пат сте да се приклучите во ЕУ, со нетрпение ве очекуваме. Сигурна сум дека еден ден ќе ја пречекаме С. Македонија со нејзиниот уникатен идентитет и нејзиниот сопствен јазик, изјави шефицата на Европската комисија, Урсула Фон дер Лајен, која од вчера е во посета на земјава. Таа на денешната прес-конференција во Владата, во своето обраќање порача дека имала одлични разговори со државниот врв.
-С. Македонија веќе постигна и изоде многу и мојата желба е дека апсолутно треба да продолжите по овој пат. Скрининг процесот се одвива одлично и ние се стремиме да ги отвориме преговорите на кластерот Основи уште оваа година, истакна Фон дер Лајен.
Официјалното лице од ЕУ исто така се осврна и на најавуваните уставни измени и се надева дека „сите партии и страни ќе ја искористат оваа можност да се придвижат напред“.
-Сега е важно да се искористи моментот. Знам дека процесите можат да бидат предизвикувачки – вие веќе го имате мотото на ЕУ- обединети во разноликоста, рече меѓу другото Фон дер Лајен.