Украинскиот претседател Володимир Зеленски ја повика Европската унија да одлучи да ги отвори пристапните преговори со Украина.
„Одамна дојде време да се отстрани оваа вештачка политичка несигурност во односите меѓу Украина и ЕУ. Дојде време да се донесе позитивна одлука за отворање на пристапните преговори“, рече Зеленски во Киев на заедничката прес-конференција со претседателката на Европската комисија, Урсула фон дер Лејен.
Зеленски ја повика ЕУ да ја забрза испораката на артилериска муниција во Украина.
Тој се заблагодари на Фон дер Лејен, која е во посета на Киев на Денот на Европа, за европската одлука да испорача „еден милион гранати“ во Украина, но тој инсистираше на распоредот за испорака.
„Разговаравме за клучното прашање – брзината на снабдување и испораката на оваа муниција. Веќе е потребна на бојното поле“, додаде Зеленски.
Во врска со извозот на украински житарки, Зеленски повтори дека ограничувањата на ЕУ се неприфатливи, „бидејќи ги зајакнуваат можностите на рускиот агресор“.
Украинскиот претседател во понеделникот со декрет објави дека 9 мај се слави како Ден на Европа, а не како ден на комеморација на победата над нацистичка Германија, која во Русија се слави според советската традиција.
„Ја поздравувам одлуката на претседателот Зеленски да го прогласи 9 мај за Ден на Европа. Украина е дел од нашето европско семејство“, изјави Фон дер Лејен пред новинарите.
Таа рече дека нејзиното присуство во Киев по повод 9 мај е симболично, но и дека тоа е знак дека „ЕУ работи рака под рака со Украина за многу прашања“.