Откако вчера интернетот беше преплавен од споделувања на видеото и фотографијата кои го прикажуваат 5 годишното крваво момче, покриено со прашина и седнато осамено и молчаливо во амбулантно возило, по преживувањето на бомбардирањето на Алепо, уметниците го земаа како симбол на денешниот апсурд и го искористија за да го пресликаат трагичниот живот на сириските деца низ повеќе уметнички дела.
(ВИДЕО+ФОТО) Снимка која го шокира светот – 5-годишно дете извлечено од урнатините во Алепо
Како можеби најсилна илустрација, ја издвојуваме приложената подолу, во која се потсетуваме на уште една трагична, потресителна слика од минатата година. Онаа на малото момче кое беше пронајдено удавено на брегот на Бодрум, во обидот за бегство.
Илустраторот Халид Албаих ги поврзува овие два ужасни призори прашувајќи го светот: Кој избор го имаат сириските деца денес?
Да останат во Сирија надевајќи се дека ќе преживеат во рушевините од постојаните бомбардирања или, пак, да побегнат, повторно надевајќи се, дека ќе преживеат во обидот?
Трагедијата е што децата немаат избор, зашто тие и онака тоа не го прават. Изборите ги прават возрасните, за нив. А, (не)изборите на возрасните ги доведоа до тој ќорсокак.
Ф.А.