Француската министерка во владата на Емануел Макрон, Марлен Скиапа, ќе се појави на насловната страница на магазинот „Плејбој“. Таа ќе се појави целосно облечена во интервју кое ќе опфати дури 12 страници од француското издание на популарниот магазин.
Во априлското издание на магазинот тaa зборува за правата на жените и LGBTQ луѓето.
Нејзината одлука да се појави на насловната страница беше критикувана од некои колеги политичари, кои во моментов се соочуваат со немири во јавноста поради пензиските реформи на Макрон.
Invité ce matin sur Europe1 le Ministre de l’intérieur @GDarmanin apporte son soutien à @MarleneSchiappa sur sa Une Une de #playboy. Il cite Cookie Dingler : « vous ne me ferez pas dire de mal de Marlène Schiappa (…) être une femme libérée, c’est pas si facile » pic.twitter.com/pz50OoQdls
— Jeanne Baron (@jeannebarontv) April 2, 2023
Предлогот за зголемување на старосната граница за пензионирање од 62 на 64 години предизвика масовни штрајкови и насилни протести какви што Франција не видела со години.
Пратеничката на Зелените, Сандрин Русо, за BFM TV изјави: „Каде е почитта за францускиот народ? за луѓето кои ќе треба да работат уште две години повеќе, кои демонстрираат, кои нема да бидат платени деновиве, кои не можат да јадат поради инфлацијата. Немам проблем со тоа да бидат изложени женските тела било каде, но постои социјален контекст“.
Француската премиерка Елизабет Борн наводно ѝ се јавила на колешката Скиапа за да ѝ каже дека „позирањето за насловната страница на Плејбој воопшто не е соодветно – особено во сегашните околности“. Сепак, Скиапа, која е и мајка на две деца, ја бранеше својата одлука на Твитер.
Défendre le droit des femmes à disposer de leurs corps, c’est partout et tout le temps.
En France, les femmes sont libres.
N’en déplaise aux rétrogrades et aux hypocrites.#Playboy— 🇫🇷 MarleneSchiappa (@MarleneSchiappa) April 1, 2023
„Ги бранам правата на жените да прават што сакаат со своето тело: секаде и секогаш. Во Франција жените се слободни. Без разлика дали тоа им пречи на уназадените и лицемерите или не“, наведе таа.
Францускиот уредник на „Плејбој“, Жан-Кристоф Флорентин, рече дека Скиапа е „најкомпатибилна за Плејбој“ од нејзините колешки поради нејзините феминистички ставови. Изданието на магазинот со Скиапа на насловната ќе биде достапно во продажба од 8 април, пишува весникот Le Parisien.
Скиапа беше авторка и блогерка која се занимаваше со женски прашања, пред Макрон да ја назначи за министерка во 2017 година. Додека беше министерка за еднаквости, таа воведе закон со кој прозивките и уличното вознемирување се незаконски.