Францускиот европратеник Рафаел Глуксман изјави дека неговата земја треба да побара од САД да ја вратат Статуата на слободата бидејќи, како што оцени, оваа земја повеќе не ги претставува вредностите по кои се водела Франција кога ја донирала оваа монументална статуа.
„Ќе им кажеме на Американците кои решија да застанат на страната на тиранинот, на Американците кои отпуштија истражувачи затоа што бараат научна слобода: „Вратете ни ја Статуата на слободата“. Ние ви ја подаривме, но вие очигледно ја презирате. Значи, добро ќе биде ако е тука дома“, рече политичарот од централно-левичарската партија „Јавен плоштад“, на што неговите поддржувачи реагираа со ентузијазам.
Статуата на слободата беше откриена во пристаништето во Њујорк на 28 октомври 1886 година, на стогодишнината од Американската декларација за независност и беше подарок од Французите на Американците. Креатор на оваа статуа е Французинот Огист Бартолди. Во Париз, на мал остров во Сена, има многу помала копија од оваа статуа.
Глуксман, исто така, го повика американскиот претседател Доналд Трамп за намалување на финансирањето на владините истражувачки институции, што ја поттикна Франција да ги покани вработените во тие институции да работат во Франција.
„Втората работа што ќе им ја кажеме на Американците е: „Ако сакате да ги отпуштите вашите најдобри истражувачи, ако сакате да ги отпуштите сите оние кои со својата слобода и чувство за иновација, нивната склоност да се сомневаат и истражуваат, ја направиле вашата земја водечка светска сила, тогаш ние ќе ги пречекаме“, рече тој.
Имено, администрацијата на Трамп, покрај намалувањето на финансирањето, настојува да отпушти и стотина оние кои работат на здравствени и климатски истражувања. Глуксман ги критикуваше и лидерите на француската крајна десница, обвинувајќи ги дека се во „фан клубот“ на Трамп и милијардерот Илон Маск, кој ги предводи напорите на Трамп да го намали американскиот јавен сектор, пишува Франс 24.