Русија очигледно се подготвува за значајна офанзива во Украина, бидејќи преместува војници на клучни позиции на бојното поле, објави „Фајненшл тајмс“, повикувајќи се на неименувани украински разузнавачки извори. Подготовките, за кои се вели дека се во тек, укажуваат дека Москва планира ескалација на војната и покрај очекуваните разговори за прекин на огнот оваа недела и повиците од Киев и неговите сојузници за безусловно 30-дневно примирје.
Русија ги отфрли предлозите за прекин на огнот освен ако тие не се придружени со суспензија на воената помош за Украина и продолжува со копнени напади по должината на фронтовската линија и со напади на долг дострел врз украинската инфраструктура.
Утрата на 14 мај, украинската армија објави дека на бојното поле се регистрирани 163 судири во последните 24 часа. Групата за мониторинг „Дипстејт“ објави дека руските сили неодамна напредувале во Торецк и во близина на Покровск, во регионот Донецк.
Веќе некое време Киев предупредува на голема руска пролетна офанзива со цел освојување на што е можно повеќе територија со цел зајакнување на Русија во евентуалните преговори. Врховниот командант Олександр Сирски минатиот месец изјави дека кампањата „всушност веќе започнала“ со интензивирање на руските напади.
Претседателот Володимир Зеленски оваа недела патува во Турција и го покани рускиот претседател Владимир Путин на разговори за прекин на огнот, што би била нивна прва средба од 2019 година.
Американскиот претседател Доналд Трамп, кој вети дека ќе посредува во мировен договор меѓу Москва и Киев, изрази оптимизам во врска со можните разговори и ги испрати државниот секретар Марко Рубио и специјалните пратеници Стив Виткоф и Кит Келог.
Кремљ сè уште не потврди дали Путин лично ќе учествува во преговорите, но „Вашингтон пост“ пишува дека Москва ќе ја претставуваат министерот за надворешни работи Сергеј Лавров и советникот на Путин за надворешна политика Јуриј Ушаков. Шефот на кабинетот на претседателот на Украина, Андриј Јермак, на 13 мај изјави дека ако Путин не дојде во Турција, тоа ќе биде „последен сигнал“ дека Русија „не сака да ја заврши војната и не е подготвена за никакви преговори“.