Се очекува САД, Велика Британија и Европската унија да го потпишат својот прв меѓународен и правно обврзувачки договор за употреба на вештачка интелигенција, објави британскиот весник „Фајненшл тајмс“.
Тројката денеска ќе ја потпише Конвенцијата на Советот на Европа за вештачка интелигенција, пишува весникот, додавајќи дека конвенцијата е подготвувана во текот на две години од повеќе од 50 земји, вклучувајќи ги Канада, Израел, Јапонија и Австралија.
САД се „посветени да обезбедат дека технологиите за вештачка интелигенција ги почитуваат човековите права и демократските вредности“ и ја истакнуваат „клучната додадена вредност на Советот на Европа во оваа област“, изјави за весникот висок службеник на администрацијата на американскиот претседател Џо Бајден.
„Тоа е прв (договор) со правна тежина на глобално ниво, а исто така обединува многу различни земји“, рече британскиот министер за технологија, според извештајот.
Конвенцијата на Советот на Европа за вештачка интелигенција, која се занимава со човековите права, демократијата и владеењето на правото, беше составена од Комитетот за вештачка интелигенција (CAI).
Комитетот ја финализираше нацрт-конвенцијата во март. После тоа, конвенцијата беше усвоена од Комитетот на министри на Советот на Европа на 17 мај, а од 5 септември ќе може да се потпише во Вилнус.