„Немам никаков сомнеж дека наставниците треба да се високо ценети членови на секоја заедница и следствено, добро платени – барем над просекот на општеството. АМА, ајде да видиме што се подготвени да ни испорачаат како услуга нашите наставници?!?“, прашува поранешниот директор на Мајкрософт во Македонија, Илијанчо Гаговски.
Тој презентираше и инфографици на кои се гледаат резултатите од PISA тестовите, спроведени во 2015 и 2018 година, кои ги спроведува OECD и тие имаат за цел да го измерат знаењето на 15-годишниците по математика, писменост и природни науки.
Во 2015 сме 69-ти од 72 земји кои учествувале во тестирањето. Во 2018 сме 67-ми од 77 земји.
„Сакате повисоки плати, драги наставници? Може, секако дека може. PISA тестирањето се прави на 3 години – за секое место нагоре на листата, бујрум 2% зголемување на платата. Нека се пласираат нашиве деца 5 места погоре, како Босна, ете ви 10%. За 13 места погоре, како Бугарија, ете ви 26%. За 22 места погоре, како Србија, и ете ви 44% зголемување на платата!Веќе ги слушам мрчаторите… „Ама Pisa е само еден вид на тестирање, и само за 15 годишници…“ – ОК, предложете и други, ова е за пример…. „Е како сега од учениците да ни зависи платата?!?“ – а од што да ви зависи? Сигурно не од бројот на сончеви денови во годината…“, истакнува Гаговски.
Додава дека е за зголемување на платите за наставниците, ама не без испорачани резултати!