Во Појасот Газа седум болници и 21 центар за примарна здравствена заштита се „надвор од функција“, а 64 припадници на медицинскиот персонал загинаа во израелските воздушни напади, изјави денеска портпаролот на палестинското министерство за здравство, Ашраф ел-Кидра.
Ел Кидра изјавил дека се уништени и 23 амбулантни возила, пренесе Си-Ен-Ен, наведувајќи дека не може самостојно да го потврди бројот на жртвите.
Канцеларијата на Обединетите нации за координација на хуманитарни прашања во четвртокот соопшти дека повеќе од 60 отсто од примарните здравствени установи во Газа се затворени и дека болниците се на работ на колапс поради недостиг на електрична енергија, лекови, опрема и специјализиран персонал.
Напад на арапската болница Ал Ахли
Најголемиот напад врз болничките установи во Газа беше бомбардирањето на арапската болница Ал Ахли, во кое загинаа стотици луѓе, меѓу кои и деца.
Како што е соопштено, нападот се случил без никакво предупредување. Граната паднала врз болницата во која имало повеќе од 1.000 луѓе.
Хамас со соопштение на својот канал на Телеграм реагираше на нападот врз болницата во Газа и го нарече „геноцид“.
Палестинските власти го обвинија Израел за нападот, кој остро ги негираше обвинувањата.
Советникот на израелскиот претседател Бенјамин Нетанјаху рече дека „Израел не бомбардира болници“, а израелските одбранбени сили (ИДФ) го обвинија Исламски џихад за гранатирањето, а милитантната организација набрзо ја отфрли одговорноста.
Hamas terrorists in their own voices:
Listen to the conversation between Hamas operatives as they discuss the failed Islamic Jihad rocket launch on the Al-Ahli Baptist Hospital on October 17, 2023 pic.twitter.com/PUUuqE2Imu
— Israel Foreign Ministry (@IsraelMFA) October 18, 2023
Израелските власти објавија дека фактите што ги имаат јасно укажуваат дека експлозијата во болницата била предизвикана од неуспешно лансирање ракета од милитантите во Газа.
Израелската војска објави наводни прислушувани разговори меѓу лидерите на Хамас, за кои Тел Авив тврди дека се случиле веднаш по гранатирањето на болницата.
Тие тврдења беа поддржани и од Соединетите Американски Држави. За време на посетата на Израел, претседателот Џозеф Бајден рече дека постои секоја можност нападот да го извршил „другиот тим, а не вие (Израел)“.
Министерството за здравство на Газа, кое го води Хамас, соопшти дека најмалку 500 луѓе загинале во експлозијата.