Агенцијата на ОН за помош на палестинските бегалци (УНРВА) предупредува дека ќе има уште многу смртни случаи во Газа поради блокадата на Израел врз палестинската територија.
„Луѓето во Газа веќе гинат во ракетните напади“, изјави Филип Лазарини, генерален комесар на УНРВА.
„Наскоро, многу повеќе ќе умрат од последиците на опсадата“, додаде тој.
Храна, вода и лекови се во недостиг, рече тој, а патиштата во Газа се преплавени со канализација. Ја оквалификува ситуацијата како „човечка трагедија“ и „пекол на земјата“.
Ситуацијата во Газа веќе беше лоша пред почетокот на војната, со околу 1,3 милиони луѓе зависни од хуманитарна помош. Речиси половина од 2,2 милиони жители на Газа се деца.
Работите се влошија за цивилите по избувнувањето на војната меѓу Израел и Хамас.
Тој наведе дека помошта од неколку десетици камиони кои досега пристигнале во Газа го одвлекува вниманието од вистинските проблеми.
„Овие неколку камиони не се ништо повеќе од трошки кои нема да направат разлика за 2 милиони луѓе“, подвлече Лазарини.