Германските власти, во соработка со бразилската полиција, затворија две платформи на Даркнет кои содржеа детска порнографија, соопшти полицијата.
„Имаше повеќе од 350.000 корисници на двете платформи и повеќе од 21.000 видеа со детска порнографија во базата на податоци“, соопшти Центарот за борба против детска порнографија и злоупотреба на интернет (ZKI) со седиште во Бамберг, Баварија.
До септември, кога страницата беше блокирана, беше прегледана речиси милион пати.
Серверите се наоѓаа во Германија, а перуанскиот државјанин кој ги управуваше онлајн платформите беше уапсен пред неколку недели во Бразил и е во притвор.
Видеата беа достапни за корисниците бесплатно, но беше можна и претплата од 0,0001 биткоин (околу 95 евра) месечно.
Според германските медиуми, станува збор за страниците „Videos Sebick“ и „Videos Yad“. Истражителите на ZKI сега се обидуваат да ги пронајдат корисниците на обете страници во Германија.