Германскиот министер за одбрана, Борис Писториус ја отфрли брзата одлука за членство на Украина во НАТО, западната воена алијанса која ја поддржува Украина во текот на нејзината војна со Русија и чии земји членки ја снабдуваат со оружје. Киев сака Алијансата да и понуди членство.
„Вратата е отворена, но сега не е време да се донесе одлука“, рече Писториус на програмата ЗДФ доцна во четвртокот, додавајќи дека Украина е свесна за ситуацијата.
Писториус рече дека одлуката за приклучување на Украина во Алијансата не може да се донесе само од солидарност, туку „со ладна глава и жешко срце. Не обратно“.
За можното членство на Украина во НАТО или во Европската унија нема да се разговара во петок, на четвртиот состанок на Контакт групата за одбрана на Украина, во американската воздушна база Рамштајн во јужна Германија, додаде министерот.
Коментарите на Писториус доаѓаат по првата посета на шефот на НАТО, Јенс Столтенберг на Украина од почетокот на руската инвазија пред 14 месеци. Тој го покани украинскиот претседател Володимир Зеленски на самитот на НАТО во Вилнус во јули, велејќи дека кандидатурата на Украина за членство во НАТО и силните безбедносни гаранции за земјата ќе бидат високо на агендата на самитот.